貓離世 該如何面對？店主自曝痛失愛寵經歷

貓離世 ，是很多主人不敢提及的痛。而森日貓酒店的店主紙情，正是一名資深貓奴，以下她將會告訴大家自己是如何面對貓離世的沉重事實。

「喺貓貓短暫生命裡，主人就係佢嘅全部...」

叮叮，喺2023年離開咗我哋，原本打算帶佢同我哋影婚照，結果都係等唔到嗰一日。叮叮離世嘅原因同大部分貓一樣，都係因為腎病。

仲未接受到叮叮走咗嘅事實，後來當屋企無咗佢...無咗佢喵喵叫要入房，入完嚟隔一陣又要出去；無咗佢瞓喺我心口上面，重到好似嚿石咁；無咗佢食我啲頭髮，食到啲髮絲濕晒；無咗佢係咁抓我新買嘅鞋，上面滿佈刮痕...

雖然叮叮就係一隻好鍾意搞事嘅貓，但其實佢心思好細膩。我嫲跌倒入院，老公咁啱離港，屋企得返我一個之際，夜媽媽係咁喊，喊住咁瞓。一起身就換到毛茸茸嘅物體，原來係佢瞓咗喺枕頭上面，陪住我。

火化當日我無睇佢推入去嗰刻，我想佢喺我心裡面最後嘅身影，係嗰個用好不屑眼神啤住我嘅大叔。

貓1歲=人類15歲
貓5歲=人類35歲
貓18歲，已經=人類88歲

所以18歲嘅叮叮已經好叻仔，幸運嘅係佢一生裡面都無大病痛。其實健健康康，就足夠了。

最近追睇韓劇《比天堂還美麗》，劇中講述寵物離世後喺天堂自由自在咁玩，有時會入主人夢裡面，安慰佢哋。唔知叮叮依家做緊咩呢？係唔係又周圍抓嘢呢？

「喺貓貓短暫生命裡，主人就係佢嘅全部...所以請盡全力愛佢，畀最好嘅生活佢，等佢整個貓生都係開開心心，幸幸福福咁過」